O profesor Xosé Carracedo Fraga acaba de publicar na prestixiosa colección Corpus Christianorum (nº 115C) da editorial belga Brepols un volume coa edición crítica e o estudo do tratado gramatical latino do mestre e bispo visigótico Xulián de Toledo (ca. 644-690). Ese tratado gramatical é o máis completo conservado da escola visigótica, xa que inclúe todos os principais campos de estudo definidos pola tradición gramatical da tardía Antigüidade. É ademais un dos primeiros e mellores exemplos do proceso de cristianización da teoría gramatical latina operado na escola medieval. Como adoita ser habitual en textos escolares, a obra chegou ata nós en dúas redaccións distintas e no volume ofrécese en paralelo o texto latino das dúas versións.